Uthishanhloko ubulawe ngesihluku ngemuva kokushiswa nemoto eRichards Bay
Kube nesigameko esidabukisayo eMandlazini, Richards Bay lapho kubikwa ukuthi uJabulani Sibanyoni, othishanhloko wesikole iMbonambi Primary, ubulewe ngesihluku. Kubikwa ukuthi ubeseneminyaka engu-36 ekulesikole.
Imibiko ithi uSibanyoni usolakala ukuthi ubulewe washiswa nemoto endaweni ephakathi neMandlazini nasendaweni eseduze noMthaniya. Umufi, okubikwa ukuthi ungowokudabuka eJohannesburg, wayenomuzi eBirdswood, Richards Bay.
Kutholakale umzimba wakhe ushe wangqongqa nemoto emgwaqeni osuka eRBM ophumela eMandlazini ngoMgqibelo. Kubikwa ukuthi wagcina ukubonakala ephuma esikoleni ngoLwesihlanu eya ekhaya.
Amaphoyisa aseqalile uphenyo ukuze kutholakale ukuthi kwenzekeni.
Thumela amazwana