Umama Uthi Akasoze Alulame Ngemuva Kokulahlekelwa Yizingane Zakhe Zombili Engozini YaseVaal
Umama waseGauteng ungene kulo nyaka omusha ngenhliziyo egcwele ubuhlungu obungenakuchazwa, ngemuva kokulahlekelwa yizingane zakhe zombili engozini embi eyenzeke endaweni yaseVaal.
Imiphakathi nemindeni isazama ukwamukela nokubhekana nalesi sigameko esishaqisile, ngesikhathi izama ukuqonda ukuthi kwenzekeni ngalolo suku olubuhlungu. Kusukela kwenzeka ingozi, abantu abaningi basebenzise izinkundla zokuxhumana ukuveza ukudabuka kwabo nokweseka imindeni ethintekile.
Lo mama okhungethwe yizinhlungu uthe ukulahlekelwa yizingane zakhe zombili kumshiye nenxeba elingasoze laphola, wathi impilo yakhe isishintshe unomphela. “Akukho umzali okufanele adlule kulobu buhlungu. Ngilahlekelwe yikho konke,” kusho yena ngezinyembezi.
Namuhla kubanjwe inkonzo yesikhumbuzo sezingane eziyi-14 ezashona ngesikhathi itekisi elithwala abafundi lishayisana neloli. Inkonzo ibanjelwe eSoul Tsotetsi Sports Centre, eZone 14 eSebokeng, lapho imindeni, izihlobo, abangani, izakhamuzi kanye nezikhulu zikahulumeni waseGauteng behlangene khona ukuzohlonipha izimpilo ezingasekho.
Izikhulumi kulo mcimbi zigcizelele isidingo sokuthuthukiswa kokuphepha kwezokuthutha zabafundi, zathi izingane kufanele zifinyelele ezikoleni ziphephile. Umphakathi ubuye wakhuthazwa ukuthi uqhubeke nokweseka imindeni esosizini, hhayi namuhla kuphela kodwa nangezinsuku ezizayo.
Njengoba izihlobo nemiphakathi iqhubeka nokulila, lesi sigameko sishiye okukhulu wokudabuka, kanti abaningi bathi izimpilo zalezi zingane eziyi-14 ngeke neze zikhohlakale.
Thumela amazwana