Lowayengunkosikazi kaMengameli waseZimbabwe, Grace Mugabe, kubikwa ukuthi akakwazi ukuya eSouth Africa ngenxa yencwadi yokuboshwa eyakhishwa ngo-2017 engakakhanselwa.
Leli cala lisukela esigamekweni esenzeka ngo-Agasti 2017 eJohannesburg, lapho uMugabe asolwa khona ngokuhlasela imodeli esencane,uGabriella Engels, ehhotela. Kuthiwa wahlaselwa ngentambo kagesi ngesikhathi kuvakashelwa eNingizimu Afrika.
Ngaleso sikhathi, udaba lwaba yimpikiswano enkulu kwezomthetho nakwezobudlelwano bamazwe. Kwavela umbuzo wokuthi ngabe uMugabe wayefanele yini ukuthola isivikelo sokungaboshwa (diplomatic immunity). Nakuba ekuqaleni kwakukhona umzamo wokumnika leso sivikelo, izinkantolo zaseNingizimu Afrika kamuva zanquma ukuthi leso sinqumo sasingekho emthethweni.
Isinqumo senkantolo savula indlela yokuthi incwadi yokuboshwa iqhubeke nokusebenza. Lokhu kusho ukuthi uma uGrace Mugabe engangena kuleli, angase aboshwe ngokushesha ukuze aphendule amacala abhekene nawo.
Lesi simo siphinde sathinta ubudlelwano phakathi kwe Zimbabwe neNingizimu Afrika, njengoba leli cala lahlanganisa izindaba zezombusazwe, umthetho kanye nezokuxhumana kwamazwe.
Kuze kube manje, incwadi yokuboshwa ka-2017 isamile, okusho ukuthi uhambo lwakhe oluya eNingizimu Afrika lusalokhu luyingozi enkulu kuye ngokomthetho.
Thumela amazwana