Umama (27) ubulale ingane yakhe (4) maqede wayingcwaba ngemuva kwendlu eThembisa
Ithuna lengane eneminyaka emine litholakale egcekeni eThembisa
Umphakathi wase Thembisa, eTeanong Section, ushaqeke kakhulu ngemuva kokutholakala kwethuna lengane yomfana eneminyaka emine egcekeni elingemuva lendlu. Kubikwa ukuthi le ngane ibulawe ngumama wayo oneminyaka engu-27 ubudala ngoLwesine, eshiya uyise wengane oneminyaka engu-26 edabukile kakhulu.
Ngokwemibiko, umzimba wengane utholakale usongwe ngezingubo ezimbili, unezilonda zokugwazwa esifubeni kanye nokusikwa emqaleni. Abezomthetho nabezimo eziphuthumayo bafike endaweni yesigameko baqala uphenyo, kwathi umzimba wathathwa wayohlolwa ukuze kutholakale imininingwane ephelele yalesi senzo esesabekayo.
Lesi sigameko sishiye umphakathi usesimweni sokushaqeka nokudabuka okukhulu. Izakhamuzi ziveze ukukhathazeka ngokwanda kwezigameko zodlame emindenini, zaphinde zacela ukuthi umthetho usebenze ngokuqinile ukuze kutholakale ubulungiswa.
Uphenyo lusaqhubeka, kanti kulindeleke ukuthi umsolwa avele enkantolo maduze. Umphakathi uqhubeka nokuthumela imiyalezo yokududuza emndenini othintekile, ikakhulukazi kuyise wengane, ngesikhathi bonke befuna izimpendulo nokuvikelwa kwezingane emphakathini.
Thumela amazwana